圖卡
說明
逐家好，今仔日來紹介語言學的物件。
一般來講，學發音當然是看人發音那聽那模仿對方的發音是較自然的。
但是，嘛毋是逐家攏有才調會使完全認捌所有的發音，
對方嘛無一定知影按怎解說伊是按怎用伊的喙發音的。
雖然講這馬真濟學語言的冊攏有真幼路的解說，
但是嘛有可能有人會看甲霧嗄嗄。
所以，這馬我紹介的圖是語言學定定出現的母音圖，
希望會使予逐家閣一種的方法去臆發音。
這張圖的母音是用喙舌的前後頂下的所在所排出來的，
我嘛囥真濟人咧學的日語、
韓國話的一寡較會hông失覺察的發音，
用你較了解的語言做伙參考，
學習的效果的方式會閣較好。
較需要斟酌看的所在是台語「o」的發音，
因為腔口差，
南部的腔較倚中央的〔ə〕(台灣華語的「ㄜ」嘛佇這个範圍內底)，
北部的腔較倚〔o〕(華語的ㄛ)。
愛注意寫羅馬字的時陣攏是寫「o」喔，
教典嘛寫「o」，
但是方音符號顛倒是寫較倚南部的「ㄜ」。
另外，〔ɔ〕的發音是喙舌較低較後壁的發音，
毋是華語的「ㄡ」喔，
「ㄡ」是〔o〕佮〔u〕合起來的雙母音喔！
〔ɔ〕的方音符號「ㆦ」(有角)嘛佮〔o〕的「ㄛ」(無角)無仝，
請方音符號使用者愛特別注意呢～！！
另外，學日語的人愛注意日語唸「う」(u)的喙較平，
雖然講講成一般膨起來的u嘛袂hông誤會，
但是按呢日語聽起來就無遐媠氣喔～
台語tsín袂輾轉 